ImtahaN leny chala hay meri beenaei ka,
us ko andaza nahiN baat ki gehraei ka

is liay rok liya uTha hua hath ham ne,
us k her waar meiN andaz tha paspaaei ka

khawb likhti rahiN aankheN dar-o-baam-e-shab pr,
subh ik pehlu dikhati rahi sachaei ka

ajnabi ho gaye ik chat taly rehny waly,
kuch to kaffara ada krna tha yakjaaei ka

maiN ne manga tha zada der ko chehra apna,
aaeina dey gaya ik zakhm shanasaaei ka

baano-e-shaam, tery surmaei aanchal sy pary,
koi sathi hay meri baadiya-paimaaei ka

ab chaTak ya na chaTak ghuncha-e-khatir, maiN ne,
raasta choR diya daikhna, purwaaei ka

us sy mil kr hui her baar mahabbat taza,
us ne badla nahiN, andaz pazeeraei ka...