Hawa-e-gul tujhy is ki khabar bhi hay keh nahiN,
ye baagh tery liay baar-war bhi hay keh nahiN...

jo hamsafar hua mera, wo mery sath bhi hy?
maiN jis safar pe chali huN, safar bhi hay keh nahiN?

bas aik chat hi to kafi nahiN makaN meiN, ye dekh
hawa ki samt khula koi dar bhi hay keh nahiN...

qafas sy krti rahi thi kabhi nazara-e-baagh
ye lutf aankh ko bar-e-digar bhi hay k nahiN...

zara ye naam ki takhti to paRh key mujh ko bata,
jahaN maiN rehti huN wo mera ghar bhi hay keh nahiN.