Safar-e-manzil-e-shab yaad nahiiN
log ruKhsat hue kab, yaad nahiiN

vo sitaara thii ki shabnam ki phuul
ek suurat thii ajab yaad nahiiN

aisaa uljhaa Gham-e-duniaa meN
ek bhii Khwaab-e-tarab yaad nahiiN

kaisii viiraaN hai guzargaah-e-Khayaal
jab se voh aariz-o-lab yaad nahiiN

yeh haqiiqat hai ki ahbaab ko ham
yaad hii kab the jo ab yaad nahiiN

yaad hai sair-e-chiraaGaaN 'Nasir'
dil ke bujhne ka sabab yaad nahiiN