Nasir' kyaa kahataa phirataa hai kuchh na suno to behatar hai
diivaanaa hai diivaane ke muu'nh na lago to behatar hai 

kal jo thaa vo aaj nahii jo aaj hai kal miT jaayegaa 
ruukhii-suukhii jo mil jaaye shukr karo to behatar hai 

kal ye taab-o-tavaa'n na rahegii Thandaa ho jaayegaa lahuu 
naam-e-Khudaa ho javaa'n abhii kuchh kar guzaro to behatar hai 

kyaa jaane kyaa rut badale haalaat kaa ko_ii Thiik nahii 
ab ke safar me'n tum bhii hamaare saath chalo to behatar hai 

kapa'De badal kar baal banaa kar kahaa'n chale ho kis ke liye 
raat bahut kaalii hai 'Nasir' ghar me'n raho to behatar hai