Kuchh to ehasaas-e-zayaaN thaa pahle
Dil kaa ye haal kahaaN thaa pahle
Ab to manzil bhii hai Khud garm-e-safar
Har qadam sang-e-nishaaN thaa pahle
Safar-e-shauq ke far_sang na puuchh
Waqt be-qaid-e-makaaN thaa pahle
Ye alag baat ki gham raas hai ab
Is me andeshaa-e-jaaN thaa pahle
YuuN na ghabaraaye huye phirte the
Dil ajab kunj-e-amaaN thaa pahle
Ab bhii tuu paas nahii hai lekin
Is qadar duur kahaaN thaa pahle
Dere Daale haiN bagoloN ne jahaaN
Us taraf chashm-e-ravaaN thaa pahle
Ab vo dariyaa na vo bastii na vo log
Kyaa Khabar kaun kahaaN thaa pahle
Har Kharaabaa ye sadaa detaa hai
MaiN bhii aabaad makaaN thaa pahle
Kyaa se kyaa ho ga_ii duniyaa pyaare
Tuu vahiiN par hai jahaaN thaa pahle
Ham ne aabaad kiyaa mulk-e-suKhan
Kaisaa sun_saan samaaN thaa pahle
Ham ne baKhshii hai Khamoshii ko zubaaN
Dard majabuur-e-fuGaaN thaa pahle
Ham ne roshan kiyaa maamuur-e-gham
varnaa har samt dhuaaN thaa pahle
Gham ne phir dil ko jagaayaa ‘Nasir’
Khaanaa_barbaad kahaaN thaa pahle
***