شہرِ آشوب میں الفت کی زباں بولتی ہوں
پر، جہاں بولنا ہوتی ہے ، وہاں بولتی ہوں

تو نے دیکھی ہے ابھی لب پہ مرے مُہرِ سکوت
تو نے دیکھا ہے کہاں جب مری جاں، بولتی ہوں

بولتی بند کرانے کا ہنر ۔۔۔۔۔۔۔۔۔۔۔۔۔۔ جانتی ہوں
کوئی بولے گا وہاں کیا، میں جہاں بولتی ہوں

میری خاموشی پہ جب جشن منانے لگے وہ
پھر بھلا چپ کہاں رہتی ہے زباں، بولتی ہوں

نطق بخشا ہے مجھے رب نے،عطا ہمت کی
چاہے ظالم پہ بہت گزرے گراں، بولتی ہوں

کام جب عشوہ طرازی کی زباں آتی نہیں 
سنگ پگھلانے کو، اشکوں کی زباں بولتی ہوں

 آنکھ سے آنکھ ہو جب محو تکلم نسرین
پھر زباں کھلتی کہاں ہے، میں کہاں بولتی ہوں

****************************