Jang 

Jang raat ke paatal me 
Raushni ki bekaar boondo’n ke 
Si sakne ki aawaz hai 
Jise kabhi nahi sun pate 
Siysatdano’n ke kaan 
Paraye roop ki angnayee me’n 
Apne husn ki jhalak dekhne ki lalak 
Naa guzair bana deti hai jang ko 

Jang 
Roothi  huyee mahbuba ka naam nahi 
Jis ki naraazgi door ki ja sakti ho 
Ek bose se 
Kisi aur ke sar se 
Pagrhi utaarne ke junoon me 
Apne sar par kafan bandhne walo 
Aman tumhare ghar ki laundi nahi 
Jis ki kalaiyo’n se tum 
Jab chahte ho utaar lete ho churhiya’n 
Khandaqe’n khodi jati hai’n 
Jis zamin ke sine me 
Doosro’n ko maar kar khud zindah rahne ki 
Behudah hawas me’n 
Nahre’n bhi nikali jaa sakti thii’n waha’n !