Kamal e zabt ko khud bhi to azamaungi, 
Mai'n apne haath se us ki dulhan sajaungi,

Supurd kar ke use chandani ke hatho'n, 
Mai'n apne ghar ke andhero'n ko laut aungi,

Badan ke karb ko wo bhi samajh na payega, 
Mai'n dil may roungi ankho'n may muskuraungi,

Wo kya gaya ke rafaqat ke sare lutf gaye, 
Mai'n kis se ruuth sakungi kise manaungi,

Wo ik rishta e benam bhi nahi lekin, 
Mai'n ab bhi us ke isharo'n pe sar jhukaungi,

Bicha diya tha gulabo'n ke sath apna wajuud, 
Wo so ke uthe to khwabo'n ki raakh uthaungi,

Ab us ka fan to kisi aur se manasub hua, 
Mai'n kis ki nazm akele may gungunaungi,

Jawaz dhundh raha tha nai muhabbat ka, 
Wo kah raha tha ke mai'n us ko bhuul jaungi,

Sama`ato'n may ghane jangalo'n ki sanse'n hai'n,
Mai'n ab kabhi teri aawaz sun na paungi.