Kuchh faisalaa to ho ki kidhar jaanaa chaahiye
paanii ko ab to sar se guzar jaanaa chaahiye

har baar eDiiyon pe giraa hai meraa lahuu
maqtal men ab ba-tarz-e-digar jaanaa chaahiye

kyaa chal sakenge jin kaa faqat mas'laa ye hai
jaane se pahale rakht-e-safar jaanaa chaahiye

saaraa jvaar-bhaataa mere dil men hai magar
ilzaam ye bhii chaand ke sar jaanaa chaahiye

jab bhii gaye azaab-e-dar-o-baam thaa vahii
aaKhir ko kitanii der se ghar jaanaa chaahiye

tohamat lagaa ke maan pe jo dushman se daad le
aise sukhanfarosh ko mar jaanaa chaahiye