Teri aankho`n me basar ho,ye zaroori to nahi`n
aisa roshan mera ghar ho,ye zaroori to nahi`n

ashk honto`n ki ha`nsi ban ke bhi beh jaate hain
aankh inke liye tar ho ,ye zaroori to nahi`n

saa`ns chalti rahi, itna bhi koi kam to n tha
zindagi jee ke basar ho ,ye zaroori to nahi`n

ye to mumkin hai ke har aankh kama`n ho lekin
har nazar teer-e-nazar ho ,ye zaroori to nahi`n

dete rehte to ho jannat ki duaai`n mujhko
mera jannat me guzar ho ,ye zaroori to nahi`n

tumne ilzaam to `kausar`p lagaye lekin
usko ruswai ka dar ho ,ye zaroori to nahi`n

Poonam `kausar`
****