* Haalaat ke qadmoN pe qalandar nahiiN girtaa *
Haalaat ke qadmoN pe qalandar nahiiN girtaa
TuuTay bhii jo taara, to zamiiN par nahiiN girtaa
girte haiN samandar meN baDe shauq se daryaa
lekin kisii daryaa meN samandar nahiiN girtaa
samjho vahaan phaldaar shajar koii nahiiN hai
voh sahan ki jismeN koii patthar nahiiN girtaa
[shajar=tree]
hairaaN hai kaii roz se Thahraa huaa paani
talaab meN ab kyuuN koii kankar nahii girtaa
is banda-e-khuddaar pe NabiyoN ka hai saaya
jo bhuuk meN bhii luqma-e-tar par nahiiN girtaa
[nabi=prophets, God's messengers]
qaaem hai Qateel ab ye mere sar ke sutuuN par
bhuuNchaal bhii aaye to meraa ghar nahiiN girtaa |