Kam kam kaho, saNbhal ke kaho, shaan se kaho
Roodaad E shouq zabt ke unwaan se kaho

Is meN kuchh apne pyaar ki izzat ka hai sawaal
Aa jaaye raah par dil E naadaan se kaho

Tark E wafaa jahaaN meN koi jurm to nahi
Kya tum wafaa shu’aar ho? eemaan se kaho

Us dar pe ahl E dil ko nahi puuchhta koi
Tum ek rayees E shahr ho! darbaan se kaho

KyuN le rahe ho hazrat E naaseh ka imtehaaN
Jo dil ki baat hai kisi insaan se kaho

Humne banaa liyaa hai naya phir se aashiyaaN
Jaao yeh baat phir kisi toofaan se kaho

Kis muNh se ab ‘Qateel’ pe dharte ho tohmateN
Yeh sab hikaayateN kisi anjaan se kaho
***