aaj aap mire haal pe karte hai.n ta.assuf

ashfaq inayat karam mehr talattuf

ai girya pas-e-qafila dil naam hai ik yaar

ye khasta bhi nibh jaa.e jo yak dam ho tavaqquf

hai Dol to naala ka vahi dil bhi vahi lek

taseer na ab is me.n hai na is me.n tasarruf

suufi hai vo be-ilm ho jo hasti se apni

kis kaam padha tu ne jo yuu.n ilm-e-tasavvuf

khamoshi bhi kuchh turfa latifa hai ki 'qayem'

karna parhe jis me.n na tasanno na takalluf

۸۸۸۸۸۸۸۸۸۸۸۸۸۸