kar imtiha.n Tuk ho ke tu khu.nkhar yak taraf

mai.n aaj yak taraf hu.n tere yar yak taraf

insaf hai ki ghair se sohbat rakhe tu garm

baiTha rahu.n mai.n misl-e-gunahgar yak taraf

sikhe ho kis se sach kaho pyare ye chaal-Dhaal

tum yak taraf chalo ho to talwar yak taraf

naz o karishma ishwa-o-andaz aur ada

main yak taraf hu.n itne sitamgar yak taraf

kis baat par teri mai.n karu.n e'tibar hae

iqrar yak taraf hai to inkar yak taraf

dekhe.n pirowe kaun bhala silk-e-lakht-e-dil

mai.n ek taraf hu.n abr-e-guhar-bar yak taraf

'qayem' har ek kuche mei.n hai turfa-taziya

yusuf tere ki garmi-e-bazar yak taraf

dallal ek samt ko mu.nh se male.n hai.n khak

sar piTte phire.n hai.n kharidar yak taraf

۸۸۸۸۸۸۸۸۸۸۸۸۸۸۸