رھنا زمیں پہ اور ستاروں کی دیکھ بھال
آنکھوں پہ جیسے قرض ھو یاروں کی دیکھ بھال
 
 
یہ خواب بُجھ نہ جائیں مری آنکھ ! آ کریں
ان قُمقموں کی اور شراروں کی دیکھ بھال
 
 
پانی ھے اور آگ ھے مٹی ھے اور ھوا
کرتا ھُوں گاھے گاھے مَیں چاروں کی دیکھ بھال
 
 
کیا ڈھونڈتے ھیں ٹوٹے دلوں میں پتہ کرو
یہ شہری لوگ اور یہ غاروں کی دیکھ بھال
 
 
اک نیم جاں چراغ کو مَیں نے بچا لیا
پھر کرنی پڑ گئی مُجھے ساروں کی دیکھ بھال
 
 
کانٹے ھوں جن کے ھاتھ میں کیسے کریں گے وُہ
پانی کے بُلبلوں کی، غباروں کی دیکھ بھال
 
 
پاوں میں چُبھ گئی ھے جو کرچی تو صبر کر
دل بھی تو کر رھا ھے ھزاروں کی دیکھ بھال
 
 
بُنیاد ھی نہیں ھے تو اُونچائی کس لئے
کیوں لوگ کر رھے ھیں مناروں کی دیکھ بھال
 
 
دھبے پڑیں گے  اب مری  پوشاکِ شعر پر
ذمےؔ لگی ھُوئی ھے گنواروں کی دیکھ بھال
 
 
آنسو بھر آئے آنکھ میں اچھا  ھُوا رضا
کرتا ھے پانی خشک کناروں کی دیکھ بھال
******