گئے وقتوں کی کہانی میں بدل سکتا ھے
یہ جہاں مرثیہ خوانی میں بدل سکتا ھے
 
 
خاک کیوں نُور سے مَعمور نہیں ھو سکتی    
لفظ کیوں اپنے معانی میں بدل سکتا ھے
 
 
جنس بازار سے غائب بھی تو ھوسکتی ھے
بھاو گِر کر بھی  گرانی میں بدل سکتا ھے
 
 
رنج بڑھ جائے تو آنسو بھی نکل سکتے ھیں
ابر بڑھ جائے تو پانی میں بدل سکتا ھے
 
 
یہ بگولہ نہیں تیزی ھے کسی شخص کی یہ
میرا حُلیہ بھی روانی میں بدل سکتا ھے
 
 
ایسا نُسخہ کوئی آئینے میں دیکھے تو بتائے
جو بڑھاپے کو جوانی میں بدل سکتا ھے
 
 
رات سُورج کو بُھلانے کی ھی کوشش ھے مگر    
دِن اسے یاد دھانی میں بدل سکتا ھے
 
 
یُونہی کرتا ھُوں مَیں ھر سال نئے گھر کی تلاش
جسم کب نقل مکانی میں بدل سکتا ھے
 
 
سچ کا نُقصآن اُٹھانے  کو بھی تیار رھو
یار من، دُشمنِ جانی میں بدل سکتا ھے
*******