اسقدر سنگ سے بیزار بناتا نہ مُجھے
اے خدا شاخِ ثمر دار بناتا نہ مُجھے
 
نُور کا ھاتھ پکڑنے کی اجازت بھی تو دے
اس میں حکمت ھے تو پھر یار بناتا نہ مُجھے
 
ایک "کُن " ھی کہا اور نہ سوچا تُونے
سوچ لیتا تو یُوں بیکار بناتا نہ مُجھے
 
حُسن کو دیکھتے ھی آگ پکڑ لیتا ھُوں
عشق میں اتنا مِلَنسَار بناتا نہ مُجھے
 
آنے جانے کے یہ دروازے کُھلے ھی رکھتا
آئینوں کے لئے زنگار بناتا نہ مُجھے
 
کربلاوں میں جو رونے بھی نہیں دیتے ھیں
ان یزیدوں میں عزادار بناتا نہ مُجھے
 
آپ ھی اپنی خراشوں سے لہو چکھتا ھُوں
اس قدر نُور میں سرشار بناتا نہ مُجھے
 
اپنی ھی بھول بھلیوں میں پھنسا رھتا ھُوں
اپنی خآطر تو پُراسرار بناتا نہ مُجھے
 
توڑنا تھا ھی نہیں توڑنے والے تُونے
ورنہ یُوں توڑ کے ھر بار بناتا نہ مُجھے
 
مُفت میں بانٹنے بھی دیتا کھلونے ، یا پھر
مالک دھر،  دُکاں دار بناتا نہ مُجھے
 
میری مٹی کو کُچھ اُڑنا بھی سکھاتا، ورنہ
کہکشاوں کا طلبگار بناتا نہ مُجھے
 
قُفلِ الفاظ ھُوں، یاروں سے کہاں کُھلتا ھُوں
حرفِ آساں تھا جو دُشوار بناتا نہ مُجھے
 
میرے معمارِ عظیم ایک سُقم اور بھی ھے
اپنی ھی راہ کی دیوار بناتا نہ مُجھے
******