ایسے جی کھول کے روتا ھُوا دِقَّت کے بغیر
شعر کہتا ھُوں روانی سے مَیں لُکنت کے بغیر
 
 
بھیڑئیے لاش کو کھاتے ھیں کراھت کے بغیر
یار رھتے ھی نہیں ھیں مری غیبت کے بغیر
 
 
کیسے اُس حُسن میں جھانکوں مَیں بصارت کے بغیر
شور میں کیسے چلا جاوں سماعت کے بغیر
 
 
کھینچتا رھتا ھے کوئی مُجھے مٹّی سے پرے
اور مَیں ھُوں کہ کِھنچا جاتا ھُوں طاقت کے بغیر
 
 
آسمانوں نے تو مُشکل میں مُجھے ڈال دیا
خاک اُڑانی ھے مُجھے، اور، کرامت کے بغیر
 
 
عشق کی  اپنی بزرگی ھے مگر کیا کیجے
اب زمانہ جو مِلا ھے اِنہیں حضرت کے بغیر
 
 
ھمیں کافر کہو، ، شاعر کہو، بے دین کہو
ورنہ ھم لوگ تو مَر جائیں گے نفرت کے بغیر
 
 
ایک دن جسم سے آگے کہیں مِلتے ھیں، چلو
ایک دن آو مرے پاس ضرورت کے بغیر
 
 
کوئی ایجاد نئی ، شعر نیا ، بات نئی!۔۔
زندگی کارِ عَبَث ھے کسی  جِدّت کے بغیر
 
 
وُھی رسمی سا تبسم، وُھی قیمت بھری بات
وُھی بازارِ محبت ھے، محبّت  کے بغیر
 
 
لامکانی  کے علاقے میں کہاں مِلنا تھا
مَیں نے منظر یہ خریدا ھے مُرمّت کے بغیر
 
 
جانے کیا بھید ھے اس کارِ سُخن دانی میں
کوئی منبر سے اُترتا نہیں دُرگت کے بغیر
 
 
آج تو یاد بھی آئی نہ مُجھے شامِ وصال  
روپڑا آج مَیں یُونہی کسی فُرِقت کے بغیر
 
 
دَم گُھٹا جاتا ھے تقلیدِ روایت سے مرا
مَیں نے زندہ نہیں رھنا ھے بغاوت کے بغیر۔
 
 
میری شاگردی میں آئیں تو سُخن سیکھیں گے
آپ سب ، شعر جو کہتے ھیں سلاست کے بغیر
 
 
رھا جاتا ھے کہاں شعر کو سُننے سے رضآ
کیسی چلتی ھیں ھوائیں کسی نکہت کے بغیر
 
*****