* Kho gayaa thaa raahbar mere baghair *
Gahazal
Kho gayaa thaa raahbar mere baghair
Kis ko thii itanii khabar mere baghair
Kushtaa e zulmat thaa main hii dahar men
Kyuun huii yaa rab sahar mere baghair
Mere hote the yahii barg o shajar
Hain vahii shams o qamar mere baghair
Ab kahaan woh lutf e toolaanii e shab
Daastaan hai mukhtasar mere baghair
Teraa naalaa bulbul e shoridaa sar
Kis tarah kartaa asar mere baghair
Jo rahaa kartaa thaa mere saath saath
Phir rahaa hai dar ba dar mere baghair
Viiraa viiraan galiyaan ujade ujade ghar
Suune suune hain nagar mere baghair
Saaz hain toote hue naghme udaas
Chup hain ab deewaar o dar mere baghair
Rahrawaan e waqt se poochh ae ‘Ravi’
Jaa rahe hain ab kidhar mere baghair
******* |