Bargashtaa-e-yazdaan se kuchh bhuul huii hai
bhatake hue insaan se kuchh bhuul huii hai

taa hadd-e-nazar shole hii shole hain chaman men
phuulon ke nigehbaan se kuchh bhuul huii hai

jis ahad men lut jaaye faqiiron kii kamaaii
us ahad ke sultaan se kuchh bhuul huii hai

hansate hain merii suurat-e-maftuun pe shaguufe
mere dil-e-naadaan se kuchh bhuul huii hai

huuron kii talab aur mai-o-saaghar se hai nafrat
zaahid tere irfaan se kuchh bhuul huii hai