Koi TiTli hai na jugnu aah shaame bekasi,
Aaj dil me'n nastaran ki shaakh phir chubhne lagi,
Too ne kya Torha gulistaa'n se wafa ka aik phool,
Har kali hai ghair mahram har shagufa ajnabi,
Be irada chal raha hoo'n zindagi ki raah per,
Mere maslak me'n nahi hai karobare rahbari,
Jisme'n kuchh insaan ki tauqeer ke ahkaam they,
woh shariyat ma'bado'n ke zere saya so gayi,
Aa gayi'n baazar mei'n bikne Khoda ki azmate'n,
Jee uthi hai khwahishe'n aur mar gaya hai aadmi,
Mai'n shuyaayo'n me'n pighal jaayu'n meri fitrat nahi,
Woh sitara hoo'n ke jisko dhoondti hai raushni,
Aur kitni door hai' "Saghar" adam ki manzile'n,
Zindagi se poochh loonga raaste me'n gar mili.