* Jab kabhii un ke tavajjo men kamii paaii gaii *
Jab kabhii un ke tavajjo men kamii paaii gaii
az sar-e-nava-e-daastaan-e-shauq doharaaii gaii
bik chuke jab tere lab phir tujh ko kyaa shikavaa agar
Zindagaanii baadaa-o-saaghar se bahalaaii gaii
Ai Gham-e-duniyaa tujhe kyaa ilm tere vaaste
kin bahaanon se tabiyat raah par laaii gaii
ham karen tark-e-vafaa achchhaa chalo yuun hii sahii
aur agar tark-e-vafaa se bhii na rusvaaii gaii
kaise kaise chashm-o-aariz gard-e-Gham se bujh gaye
kaise kaise paikaron kii shaan-e-zebaaii gaii
dil kii dhaDakan men tavazzun aa chalaa hai Khair ho
merii nazaren bujh gaiin yaa terii raanaaii gaii
un kaa Gham un kaa tasavvur un ke shikave ab kahaan
ab to ye baaten bhii ai dil ho gaiin aaii gaii
|