Chalo ek baar phir se ajnabii ban jaayeN ham donoN,
na maiN tum se ko’ii ummiid rakhuuN dil navaazii kii,
na tum merii taraf dekho Ghalat andaaz nazroN se,
na mere dil kii dhaRkan laRkhaRaaye merii baatoN meN,
na zaahir ho tumhaarii kash-ma-kash kaa raaz nazroN se,
chalo ek baar phir se ajnabii ban jaayeN ham donoN,
tumheN bhii ko’ii uljhan roktii hai pesh-kadmii se,
mujhe bhii log kahte haiN ke ye jalve paraaye haiN,
mere ham-raah bhii rusavaaiyaaN haiN mere maazii kii,
tumhaare saath bhii guzrii hu’ii raatoN ke saaye haiN,
ta’arruf rog ho jaaye to us ko bhuulnaa behtar,
ta’alluq bojh ban jaaye to us ko toRnaa achchaa,
vo afsaanaa jise ajnaam tak laanaa na ho mumkin,
use ek Khuubsuurat moR dekar chhoRnaa achchaa,
chalo ek baar phir se ajnabii ban jaayeN ham donoN.