MuhabbatoN ka hai kaal ae shab
bikhar na jaooN sambhal ae shab
wo muataqid hai t.ra usey tu
shak o shuba meiN na daal ae shab
zameen ko wo saNwar dega
zara usey tu uchal ae shab
wo rang sare chura raha hai
usi ka tha ehtemal ae shab
jawab jin ka kahiN nahiN hai
uthe heiN aise sawal ae shab
falak ki nam aaNkh kar gaya hai
t.re hunar ka zawal ae shab
wo meri aaNkhoN meiN phir sama jaay
dikha kuch aisa kamal ae shab
t.ri qasam meiN bhi jaanta huN
hai zindagi maya jaal ae shab
waheiN hai kyuN aab o dana mera
jahaN hai qahtur rijal ae shab
na jaane kyuN raushni bhi ab k
lage hai ji ka wabal ae shab
bicha raha hai wo bach k rahna
sunehre lafzoN ka jaal ae shab
khafa hai sajid use mana le
na aaye sheeshe meiN baal ae shab
******