غزل

دورِ خزاں نہ لطفِ بہاراں ہے ان دنوں
دل بے نیازِ رنگِ گلستاں ہے ان دنوں
پھر کچھ الجھ رہا ہے مرا شانۂ خیال
زلفِ حیات پھر سے پریشاں ہے ان دنوں
پھر رہبرِ خرد پہ گماں رہزنی کا ہے
پھر کاروانِ شوق ہراساں ہے ان دنوں
کتنی جنوں نواز نگاہِ خرد ہے آج
پھر چاک چاک اپنا گریباں ہے ان دنوں
کچھ ہم بھی اُس کی یاد سے برہم ہیں آجکل
کچھ ہم سے اُس کی یاد بھی نالاں ہے ان دنوں
رہ رہ کے آ ہی جاتی ہے سالک کسی کی یاد
دل وعدۂ وفا سے پشیماں ہے ان دنوں

سالک لکھنوی

2, Perfula Sarkar Street, Phears Lane
Kolkata-700072
بشکریہ ’’میر بھی ہم بھی‘‘	مرتب: مشتاق دربھنگوی
………………………