muHabbat phir us kaa bayaaN, Allah, Allah!
zameeN ho gayee aasmaaN, Allah, Allah!

huyee aarzoo phir jawaaN, Allah, Allah!
koyee ho gayaa mehrbaaN, Allah, Allah!

sar-e-t^oor-e-i'rfaaN yeh t^aafaan-e-Hairat
Hijaabaat-e-kaun-o-makaaN, Allah, Allah!

bhalaa kis t^araH miltee manzil Khudee kee?
Sanam-Khaanah-e-een-o-aaN, Allah, Allah!

nah meraa gulistaaN, nah meree Khudaayee
magar hai Gham-e-aashyaaN, Allah, Allah!

zamaaneh kee yeh karwaTeN, taubah, taubah!
muHabbat kee yeh daastaaN, Allah, Allah!

use DhooNDte, DhooNDte kho gayaa maiN
saraab-e-yaqeen-o-gumaaN, Allah, Allah!

Khudaa ban gayee meree yeh Khud-parastee
huwaa jab maiN Khud par a'yaaN, Allah, Allah!

tamannaa, Gham-e-bekasee, naa-muraadee
maqaamaat-e-aah-o-fuGhaaN, Allah, Allah!

magar zindah hai chaar-o-naachaar "Sarwar" 
taqaaZ^aa-e-daur-e-jahaaN, Allah, Allah!