masjid-e-zeest meN ik u'mr jabeeN-saayee kee
marHabaa kis ne kahaa, kis ne pazeeraayee kee?

muR ke dekhaa,nah kabhee zeHmat-e-goyaa,ee kee
waah kyaa baat hai us paikar-e-ra'naayee kee!

kuchh ne shaa,i'r kahaa aur kuchh ne kahaa deewaanah
yeh milee ham ko sazaa tujh se shanaasaayee kee

:kaun hotaa hai Hareef-e-mai-e-mard-afgan-e-i'shq:
yooN to karte haiN sabhee baat shikebaayee kee!

log to baat kaa afsaanah banaa dete haiN
warnah auqaat hai kyaa tere tamannaayee kee!

shaam-e-HirmaaN, shab-e-Gham, SubH-e-alam, roz-e-umeed
Had bhee hotee hai koyee qaafiyah-paimaayee kee!

daulat-e-zaKhm-e-jigar, Hashmat-e-aalaam-e-wafaa
koyee dekhe to faqeeree tire saudaayee kee

ek saayah thaa, guzargaah-e-naz^ar thee, maiN thaa
mujh se poochhe koyee laZZat shab-e-tanhaayee kee!

uNgliyaaN uThtee haiN har gaah zamaane bhar meN
daad achhee milee "Sarwar" tujhe Khud-raayee kee!