tawaaf-e-dair-o-Haram meN koyee mazaa nah milaa
Khudaa to kyaa naz^ar aataa, Khudaa-numaa nah milaa!
 
dar-e-Habeeb kaheeN bhee to ham ko waa nah milaa!
Hareem-e-Zaat se niklay to phir Khudaa nah milaa!
 
kitaab-e-zeest ke ik ik waraq meN kyaa nah milaa?
Ghazal nayee paRhee ham ne, nayaa fasaanah milaa!

tiree talaash thee lekin ataa-pataa nah milaa
maiN Khud ko DhooNDne niklaa to raastah nah milaa!
 
suboo-e-Zaat hee Khaalee thaa jab to kyaa Hairat?
jo bazm-e-i'shq meN paimaanah-e-wafaa nah milaa!
 
nishaan-e-raah thay jitne gumaaN-gazeedah thay
yaqeen kaa rah-e-ulfat meN naqsh-e-paa nah milaa!
 
miraa vujood thaa pardah miree nigaahoN kaa
maiN miT gayaa to koyee aur tire siwaa nah milaa!
 
galee galee tujhe DhooND aaYe, koo-ba-koo dekhaa
tiraa suraaGh, ai u'mr-e-gurez-paa, nah milaa!
 
hujoom-e-dehr meN rehte huYe maiN tanhaa thaa
naz^ar jhukaayee to dil meN hee ik zamaanah milaa!
 
t^awaaf-e-koochah-e-dil se t^awaaf-e-Ka'bah tak
maqaam ek thaa, donoN meN faaSilah nah milaa!
 
hameN yeh laZZat-e-aazaar-e-hijr kaafee hai
suroor-e-waSl kaa kyaa hai, milaa milaa nah milaa!
 
tumheN shikaayat-e-dunyaa hai har ghaRee :Sarwar:
karo ge kyaa jo koyee dard-aashnaa nah milaa?