غزل
وہی حال دلفگاراں، وہی قال سوگواراں
" نہ گیا خیال زلف سیہ جفا شعاراں "
مجھے زیست نے دیا کیا ، یہی فکر و درد وحرماں
ملا گر کوئی صلا تو فقط ایک یاد یاراں
مرا گلشن تمنا، بنا دشت نا مرادی
نہ نسیم صبح گاہی ، نہ امید باد وباراں
مجھے کاسہؑ گدائی، تجھے دولت خدائی
یہ عجیب منصفی ہے پئے تیرہ روزگاراں
ہمیں کیا کمی ہے ساقی، مےؑ ناب سر خوشی کی
ترا میکدہ سلامت زہے شوق میگساراں
یہ عجیب دوستی ہے! تری دوستی کی صدقے!
نہ خیال سوگواراں، نہ غم جگر فگاراں
میں ہوں بے نیاز ارماں، مجھے آرزو سے مطلب؟
مجھے راس آ گیا ہے مرا جذب خاکساراں
نہ جنوں میں کچھ رکھا ہے، نہ خرد سے کچھ ہے حاصل
یہ فریب خوش گمانی، وہ نصیب کم عیاراں
کوئی کیا بتائے کیا ہے یہ مزاج حسن سرور
کبھی موسم خزاں تو کبھی موسم بہاراں
*******************