سرور عالم راز
وہی حال دلفگاراں، وہی قال سوگواراں
نہ گیا خیال زلف سیہ جفا شعاراں
مجھے زیست نے دیا کیا ، یہی رنج و درد و حرماں
ملا گر کوئی صلہ تو فقط ایک یاد یاراں
مرا گلشن تمنا ہوا دشت نا مرادی
نہ نسیم صبحگاہی، نہ امید بادو باراں
مجھے کاسہء گدائی، تجھے دولت خدائی
یہ عجیب منصفی ہے، پئے تیرہ روزگاراں
ہمیں کیا کمی ہے ساقی، مئے ناب سرخوشی کی
ترا میکدہ سلامت ، زہے شوق مے گساراں
یہ عجیب دوستی ہے، تری دوستی کے صدقے
نہ خیال سوگواراں، نہ غم جگر فگاراں
میں ہوں بے نیاز ارماں، مجھے کوئی بھی نہ چھیڑے
مجھے راس آ گیا ہے ،مرا جذب خاکساراں
نہ جنوں میں کچھ رکھا ہے، نہ خرد سے کچھ ہے حاصل
یہ فریب خوش گمانی، وہ نصیب کم عیاراں
کوئی کیا بتائے کیا ہے یہ مزاج حسن سرور
گہے موسم خزاں ہے، گہے موسم بہاراں
===========