* doRe aa'tay thay mire paas sada say peHlay *
GHAZAL
doRe aa'tay thay mire paas sada say peHlay
ab woh shayad hi kabhi aa'eN qaza say peHlay
aa'da'taiN saari inaa'yat ki badal deeN usnay
ab tasal'lee nahiN daitay woh saza say peHlay
roz-o-shab woh bhi azziyat meN ho'ay haiN shaamil
yaad-e-janaaN meN jo rehtay thay juda say peHlay
khuwaahisheN saari jo pinhaaN haiN miray seenay meN
poori honay ki nahiN teri wafa say peHlay
naaz-o-andaaz hai kiya, husn kay nakhray kiya haiN
kuch bhi maloom nah tha unki ada say peHlay
khuL gaii wasl ki shab unki ha'qeeqat ham par
kitnay masoom say lag'tay thay haya say peHlay
cha'Hay janay peh hi, woh ho'ga'ay badnaam KHALISH
kiya saza paaii hai nisbat ki khata say peHlay
by shafiq khalish |