|
* aalam junoon khaiz hai hamraaz bhi nahiN *
Ghazal
shafiq khalish
aalam junoon khaiz hai hamraaz bhi nahiN
ik hamnafas to kiya, koii aawaaz bhi nahiN
woh khaamshi bapaa hai miri musht-e-khaak meN
ik shoar hashr saa bhi hai, aawaaz bhi nahiN
haasil kahaan se hoNgi tasaowur ki sa'ataiN
baaqi takhaiyulaat meN parwaaz bhi nahiN
yaad aa'ay jab bhi un ki to aaNsoo umaD paReN
woh zabt-e-gham peh thaa jo kabhi naaz bhi nahiN
ferzand-e-arjumand-e mohammad siddiq hast
haasil yahaan watan ka woh aizaaz bhi nahiN
dil men gham-e-firaaq ne choRi na nagh'magii
be-rabt dhaRkaneN haiN, koi saaz bhi nahiN
biptaa ham apne man ki sunaaeN kise KHALISH
ghuuT ghuuT ke mer rahe haiN, keh hamraaz bhi nahiN
shafiq khalish
|
|