khila naya ho koi gul to har nazar meN rahe 
kisi ke dil meN rahe woh, kisi ke sar meN rahe

tamaam umr azaboN ke hum asar meN rahe 
na zikr meN rahe kis ke, na hi nazar meN rahe
 
hamara dil na sukooN se ab aise ghar meN rahe 
jahaaN khayaal tumhara hi baam-o-dar meN rahe

zubaan rakhte hue un se mud'da'aa na kahaa 
malaal is ka, hamare dil-o-jigar meN rahe

buland jis ki talab meN rahe haiN dast-e-duaa
khuda kare keh duaaoN ke woh samar meN rahe
 
thi mukhtasar si muhabat ki zindagi itnii
lage keh jaise kisi pal, kisi sharar meN rahe
 
kise bhi piyaar-o-muhabat ka kuch nahiN tha dimaagh
sab ajnabi ki tarah hi rahe, jo ghar meN rahe

kisi bhi baat se naarazgi na ho un ki 
kahain, keh door woh hum se isi hi Dar se rahe

baghair saya-e-gaisoo kaThin hai dhoop KHALISH
chale bhi aaeN keh patte na ab shajar meN rahe
 
*******************