Aise hijr ke mausam ab kab aate hain
tere alaavaa yaad hamen sab aate hain

jazb kare kyon ret hamaare ashkon ko
teraa daaman tar karane ab aate hain

ab vo safar kii taab nahiin baaqii varanaa
ham ko bulaave dasht se jab tab aate hain

jaagatii aankhon se bhii dekho duniyaa ko
Khvaabon kaa kyaa hai vo har shab aate hain

kaaghaz kii kashtii men dariyaa paar kiyaa
dekho ham ko kyaa kyaa karatab aate hain