Siine me.n jalan aa.Nkho.n me.n tuufaan saa kyuu.N hai,
is shahar me.n har shaKhs pareshaan saa kyuu.N hai ,

dil hai to dha.Dakane kaa bahaanaa ko_ii Dhuu.NDhe,
patthar kii tarah behis-o-bejaan saa kyuu.N hai ,

tanhaa_ii kii ye kaun sii manzil hai rafiiqo,
taa-hadd-e-nazar ek bayaabaan saa kyuu.N hai ,

ham ne to ko_ii baat nikaalii nahii.n Gham kii,
vo zuud-e-pashemaan pashemaan saa kyuu.N hai,

kyaa ko_ii na_ii baat nazar aatii hai ham me.n,
aa_iinaa hame.n dekh ke hairaan saa kyuu.N hai .