غزل

بتائیں کیا زمانہ آج کل کتنا بدلتا ہے
ذرا سی دیر میں ہر آدمی چہرہ بدلتا ہے
جو رستے سے بھٹکتا ہے نہ رخ اپنا بدلتا ہے
وہی مردِ خدا حالات کا نقشہ بدلتا ہے
ابھی تو شبنمی قطروں کو انگاروں میں ڈھالا ہے
نیا انسان آگے دیکھئے کیا کیا بدلتا ہے
کہانی زندگی کی موت سے آگے نکلتی ہے
کہار اِس موڑ پر آکر فقط کاندھا بدلتا ہے
ستم یہ ہے کہ اب کوئی کسی سے کچھ نہیں کہتا
ہمارے شہر میں ہر آدمی چولا بدلتا ہے
شمیم الفاظ خنجر کی طرح دل میں اترتے ہیں
اگرچہ بولنے والا فقط لہجہ بدلتا ہے

شمیم اختر

O.K.Road, Railpar
Asansol-713302
Mob: 9832254371
بشکریہ ’’میر بھی ہم بھی‘‘	مرتب: مشتاق دربھنگوی
………………………