Mai'n to istaada wahi'n hu'n ke jahaa'n tha pahle
Tu zara dekh kahaa'n ab hai, kahaa'n tha pahle...!
Gham tera aaj bhi qaayam hai lahu ki soorat......
Farq itna hai ke aa'nkho'n se rawaa'n tha pahle....!
Bas yahi soch ke kuchh der thahar jaata hu'n........
Is kharaabe me'n kahi'n apna makaa'n tha pahle...!
Zakhm par aaya hai ehsaan ka marham rakhne.....
Mera hamdard agar hai to kahaa'n tha pahle.........!
Saaz ki lai to kabhi sher me'n dhal jaata hai...........
Haa'n wahi dard jo seene me'n nihaa'n tha pahle....!
Ab to weeraan si be-aab nazar aati hai'n................
Chashma-e-khoo'n inhi'n aa'nkho'n se rawaa'n tha pahle..!
Sab usi ghuncha-dahan ka hi karishma hai 'Shamim'..
Kya yahi lahja, ye andaaz-e-bayaa'n tha pahle.........?!