Dr. Shamim Hashimi
Yaad ka nashtar jo tanhaayi nukeela kar Gayi
Wakt ke suukhay huwe zakhmoN ko giila kar gayi
Waqt padne par wafa teri jo haila kar gayi
Zindagii ka peich-o-kham kuch aur dheela kar gayi
Dard ki bhatti me meri tishnagi tapti rahi
Aanch ki shiddat badan ka rang neela kar gayi
Dil ke sehra me kisi ki yaad ke talway jalay
Aankh ki baarish sulagti ret giila kar gayi
Unki aankhoN se bahut bachne ki koshish ki magar
Baat hi aisi thi jo chehre ko piila kar gayi
Yaad-e-maazi zehn ke sehra se yuN guzri “Shamim”
Fikr ke bikhre huwe zarroN ko tiila kar gayi
***************