Dr. Shamim Hashimi

Mila jahaan me job hi udaas udaas mila

Hamaaray ahd ka har shakhs badhawaas mila

Talaash jiski mujhe duur duur rahti thi

Khuli jo aankh to wo mere dil ke paas mila

Padha kabhi jo teri zindagi ka afsana

Meray lahoo ka kuchh usmaiN bhi iqtibaas mila

Samajh raha tha zamaana hai saath saath maagar

Nazar uthaayi to veeraana aas paas mila

Qusuur kiska hai meri samajh me aa na saka

Lahoo luhaan tamaddan ka har libaas mila

"Shamim" un ki inaayat hai aur kya kahiye

 ke meri fikr-o-nazar ko naya libaas mila

******************