ہندستاں

تری بانکی پھبن غیرتِ صد چمن
میرے ہندستاں میرے پیارے وطن
تیرے چرنوں پہ مستک جھکائے گگن
میرے ہندستاں میرے پیارے وطن
بندرا بن تیری بھگتی کا دردان ہے
دھرم ناسک ہے اجمیر ایمان ہے
روح دہلی تری ، بمبئی جان ہے
لکھنو تیرے ہونٹوں کی مسکان ہے
ہے بنارس ترے حسن کا بانکپن
میرے ہندستاں میرے پیارے وطن
نندہ پربت ترے سر کا تاج حسیں
خطِ نیپال ہے کا کل عنبریں
ہے مسوری تری خندہ خندہ جبیں
متھرا کاشی ترے عارضِ آتشیں
شملہ ، نینی تیرے تیکھے تیکھے نین
میرے ہندستاں میرے پیارے وطن
ہمگری دوش پر دودھیا شال ہے
وندھیاچل تیری گردن میں جے مال ہے
اک ہتھیلی پہ اک شمعِ بنگال ہے
اک پہ کشمیر پھولوں بھرا تھال ہے
تیرے جوڑے میں گجرات کھلتا سمن
میرے ہندستاں میرے پیارے وطن
ہے قطب تیری عظمت کا اونچاں نشاں
لال قلعہ ہے سطوت کی اک داستاں
تاج دیرینہ تہذیب کا ایک جہاں
حُسن جس میں عیاں اور محبت نہاں
غار اجنتا کے ہیں مخزن علم و فن
میرے ہندستاں میرے پیارے وطن
٭٭٭