حد سے انحد کا پتہ دکھلا رہی ہے زندگی
اِس طرف سے اُس طرف لے جا رہی ہے زندگی

مڑ کے پیچھے دیکھنے کی وقت نے دی ہے سزا
دھیرے دھیرے دیکھیے پتھرا رہی ہے زندگی

خوف مرنے کا نہیں لیکن ہے ڈر اس بات کا
نامہ اعمال لے کر جا رہی ہے زندگی

اے اجل آنے کا تیرے غم نہیں مجھ کو کوئی
دکھ ہے تو اسکا مجھے جھٹلا رہی ہے زندگی

دشمنی کیا ہے تجھے اے روشنی مجھ سے بتا
شام ہوتے ہی مجھے بھٹکا رہی ہے زندگی

مت بھروسہ کر سہانے خوابوں کی تعبیر پر
اے دلِ ناداں سنبھل ، سمجھا رہی ہے زندگی

تو محبت کی حقیقت کیا مجھے بتلائے گا
ہر گھڑی ثاقب مجھے بتلا رہی ہے زندگی
****