نذرِ اقبال

اُفتاد سرِ دست ہے اے مردمِ ناداں
پستی کی طرف ڈر ہے پلٹ جائے نہ انساں

کافر ہو کہ مومن سبھی بیگانہِ امروز
ہے چشمِ بصیرت نہ کوئی صاحبِ دل سوز

اے روم کہاں اب ہے تری قوتِ اشراق
وہ علم کہ جس میں تھا ہر اک زہر کا تریاق

وہ سازِ نفس اب ہوا بیگانہِ مضراب
ہر سُر کی چمک جس کی تھی اک انجمِ سیماب

اس عالمِ لاہوت میں القاب نہ آداب
اس چرخِ مراسم میں نہ تارے ہیں نہ مہتاب

ناسوت میں رکھتا ہے جو اِک سینہِ خاموش
ہو جاتا ہے پل بھر میں خودی سے وہ سبکدوش

اے تیرہِ کوکب یہ مجھے ہو گیا محسوس
ناواقفِ تذلیل ہیں یہ بلبل و طائوس

کب کشف زدن ہو مرے مزدور کی ہستی
کب لعل بدخشاں و منور ہو یہ بستی

کب خارا شگافوں کی صدا گونج اُٹھے گی
کب ضرب توانا رگِ باطل پہ پڑے گی

اب حُسنِ فسوں سے نہ کسی کارِ زبوں سے
مشروط ہے بیداریِ ملت تو جنوں سے

سہیل ثاقبؔ