ســــلام

سلام اے رحمتِ عالم سلام اے نورِ یزدانی
سلام اے فخرِ آدم اور فخر نوعِ انسانی

سلام اے مالکِ کوثر شفیعِ اُمّتِ عاصی
سلام اے معدنِ لطف و کرم محبوبِ سبحانی

سلام اے رونقِ کعبہ سلام اے زینتِ طیبہ
سلام اے مظہر علم و ہدایت شمعِ ایمانی

سلام اُس ذات اقدس پر مدینہ جس کا مسکن ہے
سلام اُس پر کریں جبریلؑ جس کے در کی دربانی

ہوا پُرنور کعبہ آپ کے فیضِ ولادت سے
شبِ ظلمت ہوئی کافور آئی صبحِ نورانی

چلا رحمت کا بادل کعبہ سے اٹھ کر مدینے کو
مدینہ ہوگیا رشکِ چمن اور جنتِ ثانی

ترے مسکن کے کوچہ کوچہ میں انوار کی بارش
سہانی صبحِ طیبہ ہے شبِ طیبہ ہے نورانی

اُمتہ اللہ تسنیم

(ہمشیرۂ مولانا ابوالحسن علی ندوی)
بشکریہ ’’عندلیبانِ طیبہ‘‘ مرتب: مشتاق دربھنگوی
……………………………………