* baRhey chalo- baRhey chalo *
baRhey chalo- baRhey chalo
yahi nidaa-e-waqt hai
yeH kaaynaat
yeH zamiN
nizam-e-shams ka nagiN
yeH kahkashaaN saa rastaa
issi peH gaamzan raho
yeH teeragi to aarzi hai, mat Daro
yahaaN sey door,
kuchh parey peH subah ka muqaam hai
salaa-e-bazm-e-aam hai
qadam qadam peH iss qadar rukawaTeiN keH al-amaaN
magar ajeeb shaan sey yeH karwaaN
rawaaN rawaaN chala hi jaayega parey
ufaq sey bhi parey kahiN
tumharey naqsh-e-paa meiN zindagi ka raNg
haNs rahaa hai taakeH pichhey
aaney waaloN ko pataa yeH chal sakey
keH iss taraf sey aik karwaaN guzar chuka hai kal
aur apney jism-o-jaaN ko waqf kar chuka hai kal
baRhey chalo- baRhey chalo
________________________________________
|