* Sehraa ka iltimaas liye jaa rha hooN maiN *
Ghazal
Sehraa ka iltimaas liye jaa rha hooN maiN
Dariya badast pyaas liye jaa rha hooN maiN
MaiN jazb kar rha hooN samuNdar se khauf ko
Har lehr, pur haraas liye jaa rha hooN maiN
BaNjar zamin-e-sahn-e-muqaddar kay baawajood
Ik aas , sabz ghaas liye jaa rha hooN maiN
An daikhi qurbatoN ka nigaahoN maiN sehr hay
Be aks in'akaas liye jaa rha hooN maiN
Malboos aarzuaiN bhi hoti haiN saNgsaar
Khwaahish ko be libaas liye jaa rha hooN maiN
Taarik arz-e-fikr ko karna hay taabnaak
Sooraj zameeN kasy paas liye jaa rha hooN maiN
Kitni rutoN se chaaNd pe charKha khamosh hay
Dharti se kuch kapaas liye jaa rha hooN maiN
Daikhi hay roo-e-WARD pe shabnam numa .... Nami
AankhaiN udaas udaas liye jaa rha hooN maiN
|