Barham hay aasmaan, ghataaieN lahu lahu
KaaTaiN ge khait khait se faslaiN lahu lahu

Waeday shikast khurda, tau qasamaiN lahu lahu
Ulfat hay zakhm zakhm, wafaaiN lahu lahu

KaaNToN pe paa barahna safar ki pukaar kya!
Lehja thka thka sa, sadaaieN lahu lahu

Shaayed kahiN khulus ka phir khoon ho gya
Mehsus ho rahi haiN hawaaiN lahu lahu

Waqt-e-gharoob raNg-e-shafaq surKh surKh hay
Zakhmi hay aaftaab tau kirnaiN lahu lahu

KhwaaboN ki kirchioN ki chubhan maiN kahaaN ki neeNd
“kab daikhiye keh hoN meri aaNkhaiN lahu lahu”

Hairat maiN gum hooN faisla karna muhaal hay
Manzar lahu lahu keh nigaahaiN lahu lahu

Ehsaas sar paTaKhtaa hay ziNdaan-e-waqt maiN
Karti haiN fikr ko ye salaaKhaiN, lahu lahu

Daikha sitam qalam se tapakne lga lahu
Likhta rha adeeb kitaabaiN lahu lahu

Dil Khoon ho gya hay jigar Khoon ho gya
Kya kijiye ! jo ho gyiN ghazlaiN lahu lahu

Be raNg WARD ahmari malboos miN dikhaa
KaaNtoN ne keeN jab is ki, qabaaieN lahu lahu