* KaaNtoN ka jis tarah rahay phooloN se ikhtilaaf *
KaaNtoN ka jis tarah rahay phooloN se ikhtilaaf
Duniya ko yooN hay mairay asooloN se ikhtilaaf
Mujh se ulajh liya jo zamaana, tau kya huwa!
Hota rha hay is ka..... rasoolooN se ikhtilaaf
baaleedgi-e-fikr se khaaif haiN yooN bazurg
Jaisay karay wadaira sakooloN se ikhtilaaf
Ulfat ki sar zameeN pe adaawat ki aaNghiyaN
AayiN tau ham karaiN gay bagooloN se ikhtilaaf
Jo log bo rahay haiN sar-e-raah ....khaar aaj
Kal kistarah karaiN gay, babooloN se ikhtilaaf
Bachay Gharib ehd kay kitne ajab haiN WARD
Mehnat se dosti karaiN , jhooloN se ikhtilaaf
|