نعت
ضاؔمن جعفری
کیا عجب آفاتِ دنیا نے مجھے پایا نہیں
سائے میں اُن کے ہُوں میں جن کا کوئی سایا نہیں
ہے پرِ جبریل حیراں آپ کی رفتار پر
اِتنی تیزی سے وہاں جاکر کوئی آیا نہیں
مرکزِ امّیدِ سلطان و گدا و پِیل و مور
آستانہ آج تک ایسا کوئی پایا نہیں
علم دیتا کون شہرِ علم کو، بس اِس لیے
اہلِ دنیا میں کسی سے اُن کو پڑھوایا نہیں
اپنے دشمن کی عیادت کو گیا خلقِ عظیم
موردِ الزام دشمن کو بھی ٹھہرایا نہیں
آپ کے قول و عمل کو سُن سمجھ لو، دیکھ لو
پھر نہ کہنا، مصحفِ ناطق نے سمجھایا نہیں
ہُوں گرفتہ دل اگرچہ حاسد و بد خواہ سے
آپ کی سُنَّت ہے، لب پہ بد دعا لایا نہیں
نسل سے میں آپ کی ہُوں اور مرے ضاؔمن ہیں آپ
اِس لیے میں گردشِ دوراں سے گھبرایا نہیں
_______
