غزل
یہ جو چاہتوں کا سراب ہے ترا خواب ہے مرا خواب ہے
یہ خمار مثلِ حباب ہے ترا خواب ہے مرا خواب ہے
نہیں ماہتابِ چمن تو کیا، مجھے لذتِ شبِ تار کو
یہ چراغ ہے وہ سحاب ہے ترا خواب ہے مرا خواب ہے
رہِ دشتِ کرب و بلا کو اب ذرا دیکھ حدِ نگاہ تک
وہ جو دُودِ رنگِ گلاب ہے ترا خوا ب ہے مرا خواب ہے
جو نفَس نفَس مری دھڑکنوں کے رَباب سے ہے ملا ہوا
جو سرورِ موجِ شراب ہے ترا خواب ہے مرا خواب ہے
اُسے پڑھ کے ہی تو قلندروں کو شعورِ عشق و جنوں ملا
جو کتابِ دل کا نصاب ہے ترا خواب ہے مرا خوا ب ہے
یہ سفر بھی اے مرے ہم رکاب ! یہی سمجھ کے گزار دے
یہ جو دشت ہے یہ جو آب ہے ترا خواب ہے مرا خواب ہے
ترے سیلِ چشمِ رواں کو میں بھی تو اس لیے نہیں روکتا
تری چشمِ نم میں جو تاب ہے ترا خواب ہے مرا خواب ہے
(ذیشا ن حیدرؔ )
۸۸۸۸۸۸۸۸۸۸۸۸۸۸۸