GROUP-MEHFIL-E-JOSH.!

 PROGRAMME-BAYAAD-E-GHALIB (INTERNATIONAL TARHI MUSHAIRA).!

 TARHI MISRA-BAS K DUSHWAAR HAI HAR KAAM KA AASAA'N HONA.! -------------------- 
Apni Ghalti Pe Bahartaur Pashaimaa'n Hona., 
Hai Mayassar Kaha'n Insaan Ko Insaa'n Hona,,
Kar Diye Gul Jo Hawa Ne To Ta'aajjub Kya Hai., 
Yun Bhi Manzoor Tha Kab Isko Charaaghaa'n Hona,,
Khushk Aankho'n Se Meri Ab Nahi'n Dekha Jaata., 
Fasl-E-Gul Me Koi Barbaad Gulistaa'n Hona,,
Tu Na Samjha To Bata De Ae Maseeha Maire., 
Kaun Samjhega Mere Dil Ka Pareeshaa'n Hona,,
Hamko Maaloom Hai Aytaam-E-Pareeshaa'n Ki Kasak., 
Hamne Samjha Hai Tabee'at Ka Hiraasaa'n Hona,,
Ho Ke Naakaam-E-Mohabbat Ye Samajh Me Aaya., 
"Bas K Dushwaar Hai Har Kaam Ka Aasaa'n Hona",,
Duniya Ummeed Pe Qaa'im Hai Siraj-E-Muztar., 
Ghair Mumkin To Nahi'n Uska Meharbaa'n Hona.....!

SIRAJ DEHLVI @O.P.AGARWAL 27/12/2014